賣殼的伎倆

Copy from

查金庸 - 殼王的伎倆﹙上﹚

中國大亨飲品﹙209﹚，以配股、認購新股同埋發行大量可換股債券（CB）嘅方式賣殼


第一，以0.285元配售2.8億股新股。
第二，配售價值6.224億元可換股債券﹙CB﹚，行使價0.285元。
第三，收購北京微影19.08%控制權，代價2.968億元，當中2.2億元以發行7.78億股新股份支付，發行價0.285元。

假設CB全面換成股份，原先大股東孫粗洪先生嘅控股權就會由30.43%降至11.69%。

由於收購事項，北京微影認購咗7.78億股，就成為咗大亨新嘅大股東，持有14.78%。另外CB嘅承配人換股後亦持有41.47%股權，由於佢哋超過六個人，所以唔使開名，極有可能係「人頭」代為持股。

但心水清嘅讀者一睇就會發現今次配股、認購新股同埋CB行使換股後，「一致行動人士」將會持有大亨62%控股權，即係變相以每股0.285元賣盤。


以配股、認購新股同埋發行大量可換股債券（CB）嘅方式賣殼。究竟咁做有咩好處？非常明顯地，
１。為咗避開收購超過30%股權，
２。新殼主就唔需要等兩年之後先可以注入資產，
３。亦唔會觸發全面要約，唔需要收購埋其他小股東啲股份。

讀者可能會有疑問，咁樣做唔係會大幅攤薄原先大股東嘅股權咩？點解大股東孫粗洪又會肯呢？答案呼之欲出。試諗下，如果孫先生直接將股份賣畀新殼主就只可以賺取殼價，但係如果引入強勁嘅新股東，注入優質業務，踢高個股價，再喺市場沽出，唔係賺得更盡咩？此外，大亨亦都授出購股權畀現有嘅董事，認股價0.305元，唔排除新殼主會炒高個股價畀班舊人退場賺一筆，呢個好可能係今次班舊股東同埋董事肯以另類方式賣殼嘅條件。

講開殼股，不得不提寰宇國際（1046）。上年3月，主要股東林小明將手頭上1.7億股，以每股0.248元賣咗畀中國手遊文化（8081），完成後，前者持股由20.93%降至11.02%，後者成為第二大股東，持股9.91%。之後6月同埋12月更加配咗兩次股，加埋7.57億股，配股價0.1元，完成後林先生持股降至7.61%。假設真係賣殼，過程又咁鬼祟，有心人應該煮緊一餐大茶飯，未食得。

查金庸認為今次賣殼方式極有可能模仿近日升到啪啪聲嘅中國星文化產業（8172），即係發行新股畀新殼主認購，而早前瘋狂配股可能係為咗批啲貨畀莊家遲啲炒高佢。用得呢種方式嘅話，新殼主來頭一定好猛，否則原先股東唔會肯咁樣賣殼。而新殼主最有可能係一直同集團傾緊合作嘅貴州多彩，多彩係國資委旗下企業，主要喺貴州推動文化產業，最出名係個多彩貴州城，集文化、休閒、旅遊、商業同埋娛樂於一身。阿爺成日都話要搞起中國文化產業，呢門生意食正條水，如果賣殼成功，集團股價隨時好似中國星文化咁踢高幾倍。